TVB正在開拍的綜藝節目《中年好聲音》，日前公布100名入圍參加者名單，最注目嘅當然係有「屯門三公主」之稱嘅「娜娜」（董幸兒）爆冷入圍。
早年屯門公園嘅「大媽」歌舞團被指擾民，而且演唱女子仲收打賞，似有違法之嫌，TVB節目《東張西望》都有跟進過。估唔到3年過後，娜娜再次現身《東張》，不過地點轉咗去電視城。
《東張西望》早前跟拍《中年好聲音》100強選拔情況，仲幫娜娜同fans做訪問。娜娜著名fans「Happy伯」都有跟埋入電視城打氣，熱情不減！
娜娜公開演出經驗豐富，但居然被電視城冷氣凍親，仲話凍到唱歌都口震。而fans就以特別造型撐場，Happy伯戴起粉紅色帽，仲有一位一身bling bling閃閃造型，再加cyber到爆嘅LED燈眼鏡，型到呢。
訪問時，Happy伯話見到娜娜載歌載舞就開心，而娜娜亦好感激fans支持，最緊要係佢地照舊有派利是俾娜娜呀。
