古天樂監製與主演的新片《明日戰記》成為香港國際電影節開幕電影之一，他自言已睇了新片過千次，盡了最大努力。至於「舞台王者」郭富城分享舞台經驗，表示每次開騷前都不惜多花時間，搭建真舞台綵排。
第46屆香港國際電影節昨日在西九文化區舉行記者會，出席藝人包括郭富城、古天樂、姜皓文及余香凝等。古天樂監製及主演的電影《明日戰記》成為開幕電影之一，講到拍攝科幻片，他笑說：「因為我鍾意囉！除咗警匪片、愛情片，仲有好多題材，科幻片係投資好大，總要有人行出第一步，好希望擴闊戲種。（投資幾大？）好睇就得啦，唔好講幾多錢，都使咗咯、乾埋啦！」他滿意新片，自言已看過電影一千次以上，盡了最大努力，今次以香港團隊製作，有了第一次經驗，相信再拍會有進步，並透露正籌拍另一套技術更複雜的科幻片《天梯》。
城城拍戲受傷頂硬上
影帝郭富城連續4年擔任電影節大使，他透露早前拍攝《內幕》時傷了肋骨，要小休一段時間：「戲裏面要旋轉住吊威吔，難度好高，拍咗10個Take，拉傷咗肋骨。睇咗醫生話肋骨冇裂，但係都痛住繼續拍咗個幾月。」幸有女兒呵番，城城講起即甜到漏。提到早前所住的豪宅有單位遭匪徒爆竊，他指是租給外父居住的平台單位鄰居遇竊：「嗰朝做完嘢返屋企，喺外父屋企見到隔籬屋啲窗開晒，我叫管理處報警，工人就見到賊人跳過去我哋個平台逃走。雖然拉唔到人，對面亦有損失，但已經好好彩。」並透露事發後大廈已加強保安。對於男團MIRROR舉行紅館演唱會意外頻生，他認為最重要是熟悉舞台及機關、暗位，表示自己開騷前不惜多花時間，搭建一個真舞台綵排。
