藝人張振朗與陳展鵬昨日為新劇宣傳，正在隔離的高海寧透過視像參與，劇中飾演只有小朋友心智的她感激眾拍檔陪她變得孩子氣，而張振朗笑指想不到陳展鵬也有搞笑一面！

陳展鵬、張振朗、吳家樂及楊卓娜等昨日出席無綫劇集《童時愛上你》宣傳活動，女主角的高海寧（高Ling）及糖妹雖未有到場，但透過視像參與活動。高Ling透露已返港，正在隔離中：「今次個角色好有難度，要飾演只有8歲心智嘅人，怕太誇張會畀人覺得我好作狀，好在有展鵬、振朗同糖妹陪我一齊低能。」而身在內地的糖妹大爆各人會暱稱陳展鵬為「鵬鵬」，相當可愛。

振朗大讚高Ling演技好，最難忘是拍攝時天氣酷熱：「我哋經常喺一架冇冷氣嘅車入面拍攝，又唔開得窗，入面可能有40度。（高Ling話你哋陪佢扮低能？）唔止我，展鵬都要，我都估唔到展鵬可以咁搞笑，因為佢之前都係拍打戲。」他又透露正為新劇《靈戲逼人》開工，再跟龔嘉欣合作表示開心，講到該劇的女主角原屬意李佳芯，他表示：「唔可惜，實有機會（再合作），公司對我好好，原本畀個視后我，依家畀個馬來西亞視后我。」

陳展鵬收囡囡禮物

至於陳展鵬指很久未有拍攝辦公室劇，覺得節奏快又有靚衫着：「之前啲劇着嚟着去得一件。（呢套可以畀囡囡睇？）呢套OK，其實拍嘅時候都有將自己同囡囡嘅經歷同高Ling分享。」講到父親節，他表示活動後會跟囡囡食晚飯慶祝：「我要好好珍惜呢段時間，上年父親節仲未感受到，但今年就感受到，囡囡同媽咪去咗買禮物畀我。」