呢期尊尼特普（Johnny Depp）同Amber Heard嘅官司成為西方八卦界日日追嘅新聞。Johnny Depp因為被指家暴前妻，星途大受打擊，至少原本主演嘅《怪獸與他們的產地》系列就冇咗佢份嘞。

尊尼特普另一個經典之作《魔盜王》系列，遲遲未有聲氣第6集幾時面世，最常聽到嘅update係「準備中」。

《魔盜王》系列監製謝利畢咸馬早幾日接受《星期日泰晤士報》訪問，主要宣傳新片《壯志凌雲︰獨行俠》，但係最搶fo嘅係《魔盜王6》進展。謝利畢咸馬被問到《魔6》進度時鬆口回應「係，我地同Margot Robbie傾緊」，仲爆埋「而家寫緊2款劇本，一款有Margot Robbie份，另一款冇」。

不過謝利畢咸馬冇講到，呢2個版本，係咪正是早前盛傳嘅2個版本。之前有傳，迪士尼本來有個plan係搵《切爾諾貝爾》創作人Craig Mazin重新啟動《魔盜王》系列；另一個係全新故事，由Margot Robbie前作《猛禽部隊︰解瘋小丑女》編劇Christina Hodson主理。亦有報導話，可能上頭仲有另一個劇本，係預小丑女同埋尊尼特普一齊演出！

到底開邊瓣？相信要等有關方面收到劇本，同埋尊尼特普單官司點判。如果尊尼特普未能埋位，即使《魔盜王》新片開得成，都好大可能係套外傳，同尊尼飾演嘅船長Jack Sparrow未必有太多關係。