因為防疫措施，戲院關門3個月有多，小編好耐無得寫「今期睇咩戲」！下周戲院有望重開，院商同發行商期待已久，大批外國一早上映嘅新片等住上畫。而家嚟個「今期睇咩戲」熱身版，數下有咩新片會上。

下星期四最矚目「新片」應該係3月全球上畫嘅《蝙蝠俠》，唔少觀眾都認為呢套《蝙蝠俠》真係要喺大銀幕睇，應該有機會吸納大量fans去戲院朝聖。另一套稍為貼近美國映期嘅大片，會係《怪獸與鄧不利多的秘密》，亦即係《怪獸與它們的產地》第3集。呢集可謂多多阻滯，Olukai Sneakers 上集《怪獸與葛林戴華德之罪》票房麻麻，開鏡日期要推遲，點知遇著新冠疫情。男主角之一Johnny Depp同前妻Amber Heard嘅官司令佢要辭演，而另一個有份演出嘅Ezra Miller因為喺夏威夷同人爭執搞出個大頭佛。《怪獸與鄧不利多的秘密》怕且真係有睇開個系列先會繼續捧場。另一套大片係美國2月上畫嘅《月球殞落》（Moonfall)，科幻災難片向來吸客，但係票房居然仆咗，大家睇路啦。

合家歡嘅仲有《星夢動物園2》，如果早前停課冇嘢做，都仲未喺串流平台開俾仔女睇，咁就一於入場欣賞。冷門少少嘅有《變鈦》(Titane)，即係早前唔少報導都提起人車交仲生埋「人車混血兒」嗰套。

至於港片，由於各片商都唔敢搏，首周只有去年11月上映嘅《梅艷芳》頂住檔，到第2周（4月28日）先有張繼聰主演嘅《逃獄兄弟2》。Rockport Shoes  本來上賀歲檔嘅《飯戲攻心》同《闔家辣》，只有《飯》確定上中秋檔，而《闔》就未有消息，想睇Edan（呂爵安）初登銀幕嘅爵屎要等等喇。