李婉華日前喺自家節目《豪華博客》，同身在英國嘅林子博同喺加拿大嘅杜挺豪，一齊討論TVB劇《一舞傾城》。李婉華鬧爆劇集入面KK(陳星妤飾)出賣初夜情節，認為教壞細路。

《一》製作人王晶星期六就喺內地微博出post大反擊，句句有骨!晶哥形容李婉華係「過氣四線」同「屎戲之王」，又話多年前曾經搵婉華拍戲，但係「用過一次嚇到剪左大半」。

王晶所指嘅應該係1993年由佢執導嘅電影《至尊三十六計之偷天換日》，套戲由劉德華、梁家輝、鍾麗緹及李婉華主演。李婉華戲中飾演蕩婦，同梁家輝有搞笑情慾戲。雖然有喜劇成份，但意識大膽而且對白抵死，有網民因此認為李婉華批評《一舞傾城》教壞細路欠缺說服力。