以往電視台大戰年代，搞大show對撼對家重頭節目時有發生。近年開始錄得盈利嘅ViuTV，5月7日將會舉行音樂頒獎禮 《Chill Club年度推介22／23》，旗下人氣男團MIRROR同ERROR一定會出席，加上頒獎禮玩法及演出安排同大台截然不同，唔少新一代歌手如MC張天賦、林家謙、陳蕾等都會出席。論收視點都唔夠向來入屋嘅TVB鬥，但網上聲勢一定有，預咗facebook會被洗版。

TVB當然唔會撓埋雙手，近期《中年好聲音》大熱，決賽收視更錄得最高26.4點，可以話係近年大台少見嘅好成績。有見及此，TVB將會喺Chill Club頒獎禮當晚，搵《中年好聲音》一眾選手，舉行類似「紅白歌合戰」嘅男女歌手對決音樂綜藝show。

暫名「紅白大戰」嘅節目，據報會喺《中年好聲音》26強選手入面，搵九男九女分成男女子組，喺唔同環節派組員演唱互相PK，並且有5位評審俾分嚟分勝負。暫時得知男子組人選有《中年好聲音》冠軍周吉佩、季軍羅啟豪，入圍決賽6強嘅吳大強同顏志恒；另外仲有十二強份子丁文俊、涂家堯、梁浩銓，另加表現不俗嘅魏嘉信同何博文；女子組方面就有好聲音亞軍李佳、網上人氣王龍婷，十二強選手支嚳儀、曹敏寶、林鉫偉；另外仲有陳早怡、「二家姐」李思林、梁鎧庭、李泇霖。

至於評審人選，除咗有比賽時嘅固定班底肥媽、伍仲衡、周國豐及張佳添之外，仲有殿堂級填詞人鄭國江老師加入。